Kryeministri Albin Kurti ka vendosur të ulë pagat për Qeveritarë. Gjatë ditës së djeshme ILIRIANPOST.COM kishte raportuar për letrën publike nga ish Kryetari i Rinisë së LDK-së, Armend Ibrahimi, për Kryeministrin Albin Kurti, ku i kërkonte uljen e rrogave për Deputetët dhe për Qeverinë.
Nesër më 12 shkurt, Qeveria Kurti pritet të shfuqizojë vendimin që kishte marrë Qeveria Haradinaj në fund të vitit 2017 për rritjen e pagave për vete.
Kjo është pika e parë e paraparë në rendin e ditës për mbledhjen e dytë të Qeverisë Kurti që do të mbahet nesër me fillim prej orës 10:00, raporton KTV. Ndëkohë pritet të shihet nëse do të ulen edhe rrogat e Deputetëve
Në vendimin e 20 dhjetorit 2017, Qeveria Haradinaj kishte vendosur për rritje të pagave për 100 për qind. Kryeministrit Haradinaj nga 1500 euro paga i ishte bërë 2950 euro.
Sipas Ligjit për Gjykatat paga e kryeministrit dhe e zyrtarëve të tjerë në kabinetin qeveritar është ekuivalente me pagat në sektorin e drejtësisë. Kjo kishte bërë që pagat, pos Haradinajt dhe kabinetit të tij, ishin rritur edhe në këtë sektor.
Më vonë ishte votuar Ligji për paga që parashihte rregullimin edhe të pagave të kabinetit qeveritar.
Ligji për pagat parashihte zvogëlimin e pagave edhe për kryeministrin, por ky ligj është pezulluar deri në mars pas një vendimi të Gjykatës Kushtetuese.
